خطيبك عايزك تعملى كدة..

اهلا بيكم يا احلى عرايس فى الدنيا
موضوعى النهارده مهم جدا انى اتكلم فيه معاكم ونتناقش كلنا سوا فيه وهو بخصوص
الفرح الاسلامى
او
الفرح المنفصل
من فترة كبيرة وانا عايزة اتكلم معاكم فى الموضوع ده ومكانش فى فرصة انى اعمله لكن
بقالى فترة كبيرة جدا بيجينى تليفونات ورسايل على الخاص كتير بيصرخو
ويقولولى

♥ انا وحيده ماما وبابا وعايزين يفرحو بيا وعايزينى اعمل فرح عادى وخطيبى عايز فرح اسلامى
♥ انا نفسى افرح زى صحباتى وعايزة اعمل فرح عادى وخطيبى مصمم يعملو اسلامى
♥ انا هعمل فرحى اسلامى وصحباتى بيضحكو عليا ويقولولى ايه ده احنا عايزين نفرح معاكى اعمليه عادى احسن يا اما مش هنيجى
♥ كل عيلتنا بتعمل افراح عادى وانا اول واحده هتعمله اسلامى وخايفة يبقى وحش و الستات فى العيلة بيقولولى مش هنجيلك
♥ انا منتقبة وعايزة اعمل فرح اسلامى واهل خطيبى رافضين ومش راضين وبيهددو خطيبى ميحضروش الفرح وهو محتار يعمل ايه
وكتير وكتير من اللى بسمعه من العرايس
مش هجيبلك كلام منقول من النت واجيبلك من الدين والسنه علشان اقنعك لان ده معروف ومينفعش المناقشة فيه
لكن هتكلم معاكى كلام العقل الموزون ونقنع بعض وهقنعك بالفرح الاسلامى وهتخرجى من موضوعى انتى اللى هتطلبى تعملى فرحك اسلامى
خلينى فى الاول اوضح نقطه مهمة
وهى الفرق بين الفرح الاسلامى والفرح المنفصل اللى كتير بيختلط عليهم الامر فيه هما الاتنين واحد من حيث الانفصال بين الرجال والنساء بس بينهم اختلاف بسيط جدا

الفرح الاسلامى
بيبقى باناشيد اسلامية ايا كان نوعها سواء صوت فقط بدون موسيقى او بدفوف او بموسيقى خفيفة
اما الحريمى المنفصل
هو اللى بيكون فيه الحريم منفصلين عن الرجال وبيشغلو اغانى عادية على كيفهم وده انتشر جدا
نيجى بئه لموضوعنا تعالى يا عروستى يا قمراية اسالك كام سؤال وهنرد على بعض فيهم

انتى عايزة تعملى فرحك عادى ليه؟
علشان انا عايزة ارقص وافرح انا وصحباتى لانه يوم مش بيتكرر فى عمرى

طب مين قالك ان الفرح الاسلامى مفيهوش رقص وهيصة؟
كل الافراح اللى روحتها لاقيتها كدا كل الناس قاعده ومتنكده ومحدش عارف يرقص لان الاغانى متشجعش وبالتالى بتبقى ممله

مين اللى قالك ان الاغانى متشجعش فيه اغانى جميلة كلماتها ومضمونها اسلامى وفيها موسيقى تهيص وترقص زى الفرح العادى وفيها طبله وصعيدو وكل اللى بتشوفيه وبتسمعيه فى الفرح العادى تمام بل بالعكس انتى بتاخدى راحتك اوى اوى انتى وكل النساء الموجودين لان مش بيبقى فى رجاله فى القاعه هما فى حالهم واحنا فى حالهم

الرجاله فى حالهم يعنى عريسى مش هيدخل يقعد معايا ويسيبنى طول الفرح لواحد
لاء طبعا مين فالك انه هيسيبك لواحدك ده هيدخلك ويقعد معاكى شوية وبعدين يخرج يروح يقعد مع الرجال سواء فى المسجد او فى قاعه تانيه علشان يفرحوه زى ما صحباتك هيفرحو قلبك هما كمان الشباب هياخدو راحتهم معاه ويفرحو قلبه ولا انتى مش عايزاه يفرح
####
لاء انا عايزاه يفرح معايا
طيب ما هو لما هيخلص مع اصحابه ويفرحوه هيرجع يقعد معاكى تانى ويفرح معاكى ومع امه واخواته البنات وحريم عيلته

طب هيرقص معايا سلو؟
ايوه هيرقص معاكى سلو

بس انا سمعت ان مفيش اغانى سلو بيرقص عليها العريس مع العروسة
لاء فى اغانى بيرقص عليها مع العروسة فيها كمان اغانى باللغه الاجنبيه يعنى هترقص على ميكس عربى واجنبى زى الفرح العادى بالظبط

طب والشوهات اللى بشوفها فى الافراح زى شو الدخله والشو بتاع التورتة والعصير وانى ارمى البوكية
طبعا فى كل الشوهات دى هتدخلى على دخله حلوة اوى وكمان هتقطعو التورتة سوا وتشربو العصير وهترمى بوكيه الورد على صحباتك

لسه ايه تانى خايفة منه ومش عايزة تعملى فرحك اسلامى ؟

طب بابا و اخواتى الشباب مش هيتصورو معايا
طبعا هيدخلولك وهيتصورو معاكى وباباكى هيفرح بيكى لما يشوفك احلى عروسة فى الدنيا ويشوف السعاده فى عنيكى لما يلاقيكى حققتى كل اللى بتتمنيه فى فرحك من غير ما تزعلى خطيبك وفى نفس الوقت رضيتى ربنا ومخليتيش نفسك سلعه رخيصة الشباب يدخلو يتفرجو عليها وياخدو منها بصة وحافظتى على صحباتك من الفضايح اللى بنشوفها فى الافراح العادية اللى الشباب فيها بيعاكسو البنات ويصوروهم على الموبايل ويروحو على اليوتيوب وينزلو الفيديوهات دى وانتى طبعا شوفتى الكلام ده وفى غنى عنه
طبعا زى ما شوفنا من الحوار الوهمى ده ان فى ناس اخده فكرة وحشة جدا عن الافراح الاسلامى عايزه اقولهم حاجه اخيرة
لما تعملى فرحك اسلامى انتى بتحافظى على نفسك وعلى زوجك وعلى بيتك
هتقوليلى ليه
هاقولك
اولا

هو مرضاة لربنا ورسولة اننا نعمل فرح منفصل السيدات فى مكان والرجال فى مكان لان ده بيمنع النظرة الحرام لان كل واحدة بتبقى جايه الفرح بتبقى فى احلى وابهى زينتها وده بيدى فرصة للشباب فى الافراح المختلطة انها تنظر للفتاة نظرة محرمة انتى شاركتى فيها واخدتى وزرها
ثانيا لاعتبارات اجتماعية كتيييييييييييير وهى

* ان البنات تاخد حريتها فى الفرح اكتر وتفرح للعروسة بزيادة لما يكونو براحتهم مفيش شباب يتحرجو منهم

*ممكن تكون العروسة عايزة تلبس بدلة زفاف مدلعة شوية ومن هنا تيجى نقطة الغيرة عند العريس مش عايزها حد يجرحها وبالتالى تاخد راحتها من غير تحكمات

* الفرحة بتبقى احلى لما يكون الكل حريم فى بعض الصغير والكبير الكل بيفرح وبيرقص وبيغنى للعروسة بالتالى بيبقى الفرح له جو تانى كل مرح وفرح

ثالثا

ودى اهم نقطة ان شبابنا اليوم مش عارفة ايه اللى حصلة مبقاش فيه نخوة الواحد من دول يدخل الفرح وايده الموبايل وهات يا تصوير فى البنات الللى بترقص واللى بتضحك واللى بتسلم على حد ويقولك بينهم علاقة ويااااااااااااااااااااااااه على اللى بنشوفه فى الافراح
وده ما يمنعش برضة ان فى بنات مش بريئة خالص ازاى ؟ اقولكم
الواحدة من دول تدخل الفرح وتقعد تصور البنات اللى بترقص وطبعا واخدين راحتهم على اعتبار انه حريمى فقط وتخرج من الفرح تفرج طوب الارض على الصور والمقاطع واللى اخوها يشوف الموبايل واللى جوزها يشوفه ويجى الشباب معدومى الضمير وعلى اليوتيوب يا معلم ويقوم منزل المقطع وتبقى فضيحة للبنت والفرح
فى النهاية مش هتطول عليكم علشان متتخنقوش منى
اتمنى انى اكون قدرت انى اقنعكم